MAAARI nang buksan ang mga bodega ng bigas ng National Food Authority (NFA) na ipinasara matapos na suspendihin ng Office of the Ombudsman ang 72 mga warehouse supervisor nito noong Marso.
Ito ang tiniyak ni Agriculture Secretary Francisco Tiu Laurel, Jr. matapos na bawiin ng Ombudsman ang suspensyon sa mga naturang empleyado.
Ayon kay Tiu Laurel, malaking tulong ang pagbubukas ng mga bodega sa pagbili ng karagdagang suplay ng bigas.
“I’m happy that the suspensions have been lifted on the 72 warehouse supervisors. I instructed the NFA to immediately implement the Ombudsman’s order,” ani Tiu Laurel.
Batay sa utos ng Ombudsman, binawi ang suspensyon ng 72 supervisor dahil hindi naman maapektuhan ang ginagawa nilang imbestigasyon hinggil sa umanoy maanomalyang pagbili ng rice buffer stock kahit na patuloy ang mga ito sa kanilang trabaho.
Samantala. sinabi naman ni Tiu Laurel na ilalabas nila sa madaling panahon ang resulta ng sarili nilang imbestigasyon ukol sa naturang isyu at kanila itong agad ibibigay sa Ombudsman.
Noong Marso nang suspendihin ng Ombudsman sa anim na buwan si dating NFA administrator Roderico Bioco, assistant administrator for operations John Robert Hermano,12 regional managers, 27 branch managers, at 98 na warehouse supervisors sa buong bansa.
Matapos ang ilang linggo, unang binawi ng Ombusdman ang suspensyon ng 23 na warehouse supervisor.
“A closer evaluation of the case record, subsequent/additional compliances made to and pleadings submitted to this Office reveal that the documents/evidence pertaining to the case, which all of the aforementioned warehouse supervisors from Region III, Region IV-A, MIMAROPA, Region V, Region VI, Region VII, Region IX, Region X, Region XII, Region XIII and BARMM have control and custody, were already obtained by this Office,” saad pa ng utos ng Ombudsman.